Үндэсний үйлдвэрлэгч ОРА МЕТАЛЛ компанийн 20 жилийн ой, Ерөнхий захирлын мэндчилгээ

Аймгаараа овоглосон ОРА МЕТАЛЛ нэртэй компанийг 2004 онд үүсгэн байгуулж байснаас хойш 20 жил өнгөрчээ. Анх 16 ажилчидтай байсан бол өнөөдөр инженер-металлургч, химич, ган хайлагч, хэвчин, гагнуурчин, цахилгаанчин, сантехникч зэрэг мэргэжлийн 100 орчим ажилчид бүхий орчин үеийн дэвшилтэд техник технологи бүхий металлург цутгуурын автомат үйлдвэр болон өргөжин тэлж өсөн дэвшиж ирлээ. Өнгөрсөн 20 жилийн хугацаанд үйлдвэр маань анхны хүчин чадлаа 8 дахин нэмэгдүүлж уул уурхайн томоохон компаниуд болох Оюутолгой ХХК, “Эрдэнэт үйлдвэр” ТӨҮГ, “Бороогоулд” ХХК, цементийн үйлдвэрүүд, дулааны станцуудад бүрэн танигдсан чанартай бүтээгдэхүүн үйлдвэрлэдэг үндэсний металлургийн үйлдвэр болж чадсан байна. Бид өнгөрсөн 20 жилийн хугацаанд дараах бүтээн байгуулалтуудыг хийсэн байна. Үүнд:

-2004 онд жилд 1000тн Элэгдэлд тэсвэртэй хромоор сайжруулсан цутгамал ган бөөрөнцгийг Монголд анх удаа байгуулан үйлдвэрлэж эхэлсэн

-2010 онд 3000м2 талбай бүхий цутгуурын үйлдвэрийн барилга барьж, тоног төхөөрөмжөө шинэчлэн үйлдвэрлэлийн хүчин чадлаа 3000тн-д хүргэсэн

-2016 онд 4500м2 талбай бүхий цутгуурын үйлдвэрийн барилгын өргөтгөл хийж, тоног төхөөрөмжөө шинэчлэн үйлдвэрлэлийн хүчин чадлаа 7,000 тн болгосон

-2016 оноос Оюутолгойн импортоор авдаг байсан өндөрт хромт тээрмийн бөөрөнцөгийг Монголд анх удаа үйлдвэрлэж ханган нийлүүлэгчээр ажиллаж эхэлсэн

-2023 онд Хөөсөн загвараар вакуум орчинд цутгах технологийг Монголд анх удаа нэвтрүүлэн уул уурхайн түргэн элэгддэг тээрмийн хуяг, экскаваторын шүд зэрэг эд ангиудыг үйлдвэрлэж эхэлсэн

-2024 онд Тасралтгүй цутгах Цутгуурын автомат шугамыг Монголд анх удаа нэвтрүүлэн Оюутолгой болон Дулааны станцуудын хэрэгцээт ган бөөрөнцгийг чанарын өндөр түвшинд MNS6907:2021 стандартын дагуу үйлдвэрлэж байна. Энэхүү автомат шугамыг нэвтрүүлсэнээр үйлдвэрлэлийн хүчин чадал бүтээмжийг нэмэгдүүлж цутгуурын хольц бэлтгэх, хэв барих, металл цутгах, цутгамал салгах зэрэг процессыг автоматжуулан, хүний гар ажиллагааг багасгаж хүнд хөдөлмөрийг хөнгөвчилсөн, бүтээгдэхүүний чанар, бүтээмжийг нэмэгдүүлсэн, хүнээс хамаарах гологдолыг эрс бууруулж чадсан орчин үеийн дэвшилтэт технологи болсон юм.

Манай компанийн энэхүү амжилт бол компанийн үүсгэн байгуулагчдийн зүгээс үйлдвэрээ хөгжүүлэх урт болон дунд хугацааны биенес төлөвлөгөөний дагуу үйлдвэрлэлийн процессыг автоматжуулах, өргөтгөх, шинэ төрлийн бүтээгдэхүүний нэр төрлийг нэмэгдүүлэх, өндөр чанартай өрсөлдөх чадвартай бүтээгдхүүн үйлдвэрлэх, хүчин чадлаа нэмэгдүүлэх, урт хугацаанд тасралтгүй үйл ажиллагаа явуулах, нэн тэргүүнд аюулгүй байдлыг эрхэмлэн дээдлэх, мөрдөх, ажилчдынхаа нийгмийн асуудлыг шийдвэрлэх, мэргэжил ур чадварыг дээшлүүлэх чиглэлээр үе шаттайгаар хөрөнгө оруулалтаа тасралтгүй хийж ирсэний үр дүн юм.

Энэ бол ОРА МЕТАЛЛ компанийн хамт олон та бидний хамтын амжилт, хамтын бүтээн байгуулалт юм.

Бид Дэлхийн стандартаар Монголдоо үйлдвэрлэнэ гэсэн алсын хараатай ажиллаж байгаа. Компанийн удирдлага менежментийн баг нь хувь нийлүүлэгчид болон ажилчидтайгаа компанийхаа хөгжлийн бодлого эрхэм зорилгоо ил тод нээлттэй хэлэлцэн хүндрэл бэрхшээл, амжилт ололтоо хамтдаа хуваалцан үйлдвэрлэл эрхлэгч бидэнд тийм ч их тааламжтай биш татвар болон зээлийн хүү өндөртэй, тендерүүд нь үндэсний үйлдвэрлэл, дотоодын худалдан авалтыг дэмждэггүй, Хятад Орос гэсэн дэлхийн 2 том үйлдвэрлэгч хөрш орноос хямд үнэтэй ган бөөрөнцөг, цутгамал эд анги Монголын зах зээлд ноёрхсон маш хэцүү ширүүн бизнесийн өрсөлдөөнийг даван туулж 21 жил тасралтгүй үйл ажиллагаагаа явуулж ирсэн. Бид цаашид ч гэсэн олон арван жил Монголынхоо металлургийн салбартаа өөрийн байр сууриа хадгалан урт хугацаанд өрсөлдөх чадвараа хадгалан ажиллах болно. Үндэсний үйлдвэрлэл Монголын хөгжлийн гарц гэдэг. Бид зорьсон зорилго зорилтодоо хүрч монголынхоо уул уурхайн салбарын зах зээлд бүрэн хүлээн зөвшөөрөгдсөн экспорт хийдэг компани болно гэдэгт итгэл төгс байгаа гэдгээ илэрхийлж байна.

ОРА МЕТАЛЛ ХХК-д ажиллаж байгаа бүх ажилчидаа 20 жилийн ойн баярыг тохиолдуулан гадаадад аялуулах шийдвэр гарган бэлэг барьж талархан шагнаж урамшуулж байна. Үүнд: 15-аас дээш ажилласан нийт 22 ажилтаныг Турк улсад аялах эрхийн бичгээр, 10-аас дээш жил ажилласан 22 хүнийг алдарт Хайнань аралд амрах эрхийн бичгээр, 5-аас дээш жил ажилласан 40 хүнийг БНХАУ-ын Хөх хот-Ордос-Чингисийн онгоноор аялах эрхийн бичгээр, 5 хүртэлх жил ажилласан 15 ажилтныг БНХАУ-ын Манжуурийн аялалаар явах эрхийн бичгээр шагнаж та бүхний хөдөлмөр зүтгэлийг үнэлэж байгаагаа уламжлан мэдэгдэж байна.

Өнгөрсөн 20 жилийн турш надад итгэж надтай хамт нэг баг болон бүхий л хүндрэл бэрхшээл бүхнийг хамтдаа туулж өнөөдрийг хүрсэн ОРА МЕТАЛЛчууддаа их баярлалаа.

Манай компанийн бүтээгдэхүүнийг хамгийн сайн гэж хүлээж зөвшөөрч үндэсний үйлдвэрлэгчээ дэмжин хамтран ажиллаж байгаа эрхэм хэрэгчид, бизнесийн хамтрагчид болон түүний дотроос Оюутолгой, Эрдэнэт үйлдвэрийн удирдлага хамт олонд гүн талархал илэрхийлье. 

ОРА МЕТАЛЛ ХХК-д олон улсын MNS ISO9001:2015 Чанарын менежментийн тогтолцооны стандарт, MNS ISO45001:2018 Хөдөлмөрийн Эрүүл Мэнд, Аюулгүй Байдлын менежментийн тогтолцооны стандарт, MNS6907:2021 Тээрмийн хромоор сайжруулсан цутгамал ширмэн бөөрөнцөг. Техникийн шаардлагыг боловсруулах мөрдүүлэх чиглэлээр зөвлөн тусалж дэмжин хамтран ажилладаг С.Давааням захиралтай SFCS компанийнханд гүн талархал илэрхийлж байна.

Монголынхоо металлургийн салбарын хөгжлийн төлөө хамтран зүтгэж яваа, дэмжиж ажилладаг Монголын Металлургийн Холбооны тэргүүн Ц.Мөнхжаргал болон бусад удирдлага, нийт металлургчид, салбарын эрдэмтэд багш нарт гүн талархал илэрхийлэн баяраа хуваалцаж байна. 

Та бүхэндээ ОРА МЕТАЛЛ компанийн 20 жилийн ойн баярын мэндийг хүргэж аз жаргал амжилт бүтээлийн дээдийг хүсье.

ОРА МЕТАЛЛ ХХК-ийн Ерөнхий  захирал  С.Бат-Эрдэнэ(PhD)